كوشىپ كەتكەندەردىڭ 4 مىڭعا جۋىعى ەلىمىزدىڭ وزگە وڭىرلەرىنە, ال, قالعان 1310 ادام شەتەلگە جول تارتىپتى. كەرىسىنشە, وڭىرگە بيىل 2547 ادام كوشىپ كەلىپتى. قازىر وبلىستا 756 مىڭ ادام تۇرادى. بۇل ساننىڭ 70 پايىزدان استام ۇلەسىن قالالىقتار قۇرايدى. اۋىلداردا 300 مىڭعا جەتەر-جەتپەس حالىق قالعان. جالپى, جۇمىسسىزدىق دەڭگەيى بۇگىندە 4,9 پايىزدى قۇراپ وتىر.
وتكەن اپتادا وڭىردەگى ۋسپەن اۋدانى, ولگينكا دەگەن اۋىلعا قىتايدان بالالى-شاعالى 18 ادامى بار 5 وتباسى كوشىپ كەلدى. بۇل 334 تۇرعىنى عانا قالعان ولگين اۋىلىنىڭ تۇرعىندار سانىنا قوسىلىپ, قونىس اۋدارۋشىلار قاتارى بارا-بارا كوبەيەدى دەگەن ءسوز. ەلگە ەل قوسىلسا قۇت. ولگينكانىڭ اتى دا وزگەرىپ, الىستان جەتكەن اعايىننىڭ تىلەگىنە ساي جاراسار.
ال, وبلىستىق ءبىلىم بەرۋ باسقارماسىنىڭ حابارىنشا, بيىل وڭىردەگى تەحنولوگيالىق, حيميا-مەحانيكالىق, بيزنەس, جاياۋ مۇسا اتىنداعى اقسۋ, كراسنوارمەيكا, باياناۋىل اگرارلىق-تەحنيكالىق كوللەدجدەرى «سەرپىن» مەملەكەتتىك باعدارلاماسى بويىنشا 200 ستۋدەنت قابىلداماقشى. قازىر وڭتۇستىك قازاقستان, قىزىلوردا, ماڭعىستاۋ, الماتى, جامبىل وبلىستارىنان كەلۋگە نيەتتەنگەن باسقا دا تۇلەكتەردىڭ قۇجاتتارى قابىلدانۋدا.
ءبىزدىڭ وڭىردەن بارعان اۋداندىق اكىمدىكتەر وكىلدەرى وڭتۇستىك قازاقستاننىڭ ماقتاارال, سارىاعاش اۋداندارىن ارالاپ, كەزدەسۋلەر ۇيىمداستىرۋدا.
ەندى وڭىردەگى 10 اۋدانعا 50 وتباسىن قابىلداۋ دا جوسپارلانىپ وتىرعان كورىنەدى.
فاريدا بىقاي, «ەگەمەن قازاقستان»